ஆலங்குளத்தில் போக்குவரத்து பணிமனை அமைக்க வேண்டும் என போக்குவரத்து துறை அமைச்சர் சிவசங்கரிடம், சிவபத்மநாதன் கோரிக்கை விடுத்துள்ளார்.
இது குறித்து முன்னாள் தென்காசி தெற்கு மாவட்ட திமுக செயலாளர் வக்கீல் பொ.சிவபத்மநாதன், தமிழக போக்குவரத்து துறை அமைச்சர் சிவசங்கரை நேரில் சந்தித்து அளித்த மனுவில் கூறியிருப்பதாவது:-
தென்காசி மாவட்டம், ஆலங்குளம் சட்டமன்ற தொகுதியின் தலைநகராக விளங்கும் ஆலங்குளம் பேரூராட்சியானது நகராட்சியாக வளர்ந்து வரும் பகுதியாகும். கடந்த 2023-ம் ஆண்டு நான் தங்களிடம் நான் வைத்த கோரிக்கையின் அடிப்படையில், ஆலங்குளத்திற்கு மோட்டார் வாகன ஆய்வாளர் அலுவலகம் உருவாக்கப்பட்டு தங்களால் திறந்து வைக்கப்பட்டது.
ஆலங்குளத்திற்கு கடந்த 10 ஆண்டுகளுக்கு முன்பே போக்குவரத்து பணிமனை அமைக்கப்பட இருக்கிறது என்று பேசப்பட்டு பின்னர் அது திருநெல்வேலி மாவட்டம் சேரன்மகாதேவிக்கு மாற்றப்பட்டது. தற்போது தென்காசி மாவட்டத்தில் தென்காசி, செங்கோட்டை, புளியங்குடி மற்றும் சங்கரன்கோவில் என நான்கு அரசு போக்குவரத்து பணிமனைகள் உள்ளன.
இந்த 4 பணிமனைகள் மற்றும் திருநெல்வேலி மற்றும் பாபநாசம் பணிமனை ஆகியவற்றில் இருந்து ஆலங்குளத்திற்கு இயக்கப்படும் பேருந்துகள் இரவில் பயணிகளை பேருந்து நிலையத்தில் இறக்கிவிட்டு பணி முடிந்து இரவில் தொலை தூரத்தில் உள்ள அந்தந்த பணிமனைகளுக்கு பேருந்தினை நிறுத்த கிளம்பி செல்கிறது. இதனால் அரசுக்கு எரிபொருள் செலவும் காலவிரயமும் ஏற்படுகிறது. தென்காசி முதல் திருநெல்வேலி இடையில் எந்த அரசு போக்குவரத்து பணிமனையும் கிடையாது.
ஆலங்குளம் பகுதியை சுற்றி நூற்றுக்கும் மேற்பட்ட கிராமங்கள் உள்ளது. இக்கிராமத்திற்கு வரவேண்டிய பேருந்துகள் தொலைதூரத்தில் உள்ள பணிமனைகளில் இருந்துதான் இயக்கப்பட்டு வருகிறது. மேலும் கிராமங்களுக்கு செல்லுகிற நகர கட்டணமில்லா பேருந்து 10 க்கும் மேற்பட்ட பேருந்துகள் ஆலங்குளம் பேருந்து நிலையத்திலேயே இரவில் நிறுத்தப்படுகிறது.
ஆலங்குளம் பகுதியில் தென்காசி - திருநெல்வேலி நெடுஞ்சாலை ஒட்டி போக்குவரத்து பணிமனை அமைவதற்கான இடவசதி உள்ளது. எனவே ஆலங்குளம் பகுதியில் போக்குவரத்து பணிமனை அமைத்திட ஆவன செய்ய வேண்டுமாய் தங்களை கேட்டுக்கொள்கிறேன்.இவ்வாறு அதில் தெரிவித்துள்ளார்.
அப்போது பொதுக்குழு உறுப்பினர் சாமிதுரை, கடையநல்லூர் முன்னாள் ஒன்றிய செயலாளர் காசிதர்மம் துரை உடனிருந்தனர்.
0 Comments