கிழிக்க சொன்னது நான்தான்.... முடிஞ்சா என்னை கைது செய்ய சொல்லுங்க..... சீமான் மனைவி பேட்டி

 

நடிகை விஜயலட்சுமி சீமான் தன்னை  பாலியல் பலாத்காரம் செய்து ஏமாற்றிவிட்டதாக புகார் கொடுத்த நிலையில் இந்த வழக்கை12 வாரத்திற்குள் முடித்து குற்றப்பத்திரிகை தாக்கல் செய்ய வேண்டும் என்று சென்னை வளசரவாக்கம் போலீசாருக்கு சென்னை உயர்நீதிமன்றம் உத்தரவிட்டுள்ளது. இந்நிலையில் இன்று  காலை 11 மணிக்கு வளசரவாக்கம் காவல் நிலையத்திற்கு நேரில் ஆஜராக வேண்டும் எனவும் ஒருவேளை நேரில் ஆஜராகாவிட்டால் சீமானை கைது செய்ய நேரிடும் என எச்சரித்து போலீசார் அவருடைய வீட்டில் சம்மன் ஓட்டினர்.

இதனை நாம் தமிழர் கட்சியின் தொண்டர்கள் கிழித்துள்ளனர். இது தொடர்பாக கேட்க சென்ற போலீசாரை சீமான் வீட்டு காவலாளி தாக்கியுள்ளார். சீமான் வீட்டில் காவலாளியாக வேலை பார்ப்பவர் ஓய்வு பெற்ற ராணுவ வீரர். அவருடைய பெயர் அமல்ராஜ். இவர் போலீசாரை தாக்கியதோடு தான் கையில் வைத்திருந்த துப்பாக்கியை எடுத்து அவர்களை மிரட்டியுள்ளார். இதனால் போலீசார் அமல்ராஜை குண்டுகட்டாக தூக்கி கைது செய்தனர். இதைத்தொடர்ந்து அவரிடம் இருந்த துப்பாக்கியையும் பறிமுதல் செய்துள்ளனர். அது பாயிண்ட் 3 துப்பாக்கி வகையை சேர்ந்தது. அந்த துப்பாக்கியை பறிமுதல் செய்த போலீசார் 20 குண்டுகளையும் பறிமுதல் செய்தனர். அதோடு மற்றொரு காவலாளி சுபாகர் என்பவரையும் போலீசார் கைது செய்தனர். இவர்கள் இருவரையும் நேற்று இரவு நீதிமன்றத்தில் ஆஜர் படுத்திய நிலையில் சோழிங்கநல்லூர் நீதிமன்ற நீதிபதி கார்த்திகேயன் மார்ச் 13ஆம் தேதி வரை நீதிமன்ற காவலில் வைக்க உத்தரவிட்டுள்ளார்.

இந்நிலையில் சீமானின் மனைவி கயல்விழி தற்போது செய்தியாளர்களை சந்தித்து பேசினார். அவர் பேசியதாவது, நான் வீட்டுக்குள் இருந்த நேரத்தில் சம்மனை போலீசார் கொண்டு வந்தனர். அவர்கள் எங்களிடம் அந்த சம்மனை தந்திருக்கலாம். ஆனால் அவர்களுக்கு தர மனமில்லாததால் அதனை ஒட்டி விட்டு சென்றனர். நான் அப்போது நைட் டிரஸில் இருந்ததால் வெளியே வருவதற்கு ஒரு மாதிரி இருந்தது. இதன் காரணமாக அந்த சம்மனை நான் தான் கிழித்து வர சொன்னேன்.

 அந்த சம்மனில் என்ன இருக்கிறது என்பதை படிப்பதற்காக தான் கிழிக்க சொன்னேன். எங்களை அசிங்கப்படுத்தி மனரீதியாக துன்புறுத்துவதற்கு காவல்துறை முடிவு செய்து தான் இப்படி எல்லாம் செய்கிறது. சென்னை உயர்நீதிமன்றம் பாலியல் வழக்கு தொடர்பான விசாரணையை விரைந்து முடிக்க வேண்டும் என்று கூறியதற்காக அவர்கள் மறுநாளே வந்துள்ளனர். சீமான் மக்களுக்கான நேர்மையான தலைவர். மேலும் சம்மனை கிழிக்க சொன்னது நான்தான். முடிந்தால் என்னை கைது செய்ய சொல்லுங்கள் என்று கூறினார்.