கட்டுமாவடி மீன் மார்க்கெட்டில் விற்பனைக்கு வந்த பெரிய கலிங்கமுரல் மீன்கள் ஒரு கிலோ ரூ.550 க்கு விற்பனை

கட்டுமாவடி மீன் மார்க்கெட்டில் பெரிய கலிங்க முரல் விற்பனைக்கு வந்தது. இந்த மீன் ஒரு கிலோ 550 ரூபாய்க்கு விற்பனையானது. 

புதுக்கோட்டை மாவட்டம் அறந்தாங்கி அடுத்த கட்டுமாவடியில் மிகப்பெரிய மீன் மார்க்கெட் உள்ளது. இந்த மீன் மார்க்கெட்டிற்கு அவ்வப்போது பெரிய மீன்களும், அரிய வகை மீன்களும் விற்பனைக்கு வருவது வாடிக்கையாகும். இந்த நிலையில் கணேசபுரத்தைச் சேர்ந்த கோகுல்ராமன் என்பவரது வலையில் 7 பெரிய கலிங்க முரல் மீன்கள் பிடிபட்டது. 

பொதுவாக இந்த மீன்கள் இந்த சீசனில் வருவது மிக அரிதாகும். ஆனால் மற்ற நாட்களில் அதிகமாக கிடைக்கும். இந்த மீன்கள் கட்டுமாவடி மீன் மார்க்கெட்டுக்கு விற்பனைக்கு கொண்டு வரப்பட்டது. இந்த மீன் ஒரு கிலோ 500 முதல் 550 வரை விற்பனையானது. ஆனால் சாதாரண நாட்களில் இந்த மீன்கள் 350 முதல் 400 ரூபாய் வரை விற்பனையாகும். தற்போது அரிதாக கிடைத்த இந்த மீன் அதிக விலைக்கு விற்பனையானது குறிப்பிடத்தக்கது.