இந்த முட்டை செல்லாது..... ஒப்பந்தத்தை ரத்து செய்ய அரசுக்கு மாவட்ட நிர்வாகம் பரிந்துரை......

 

விருதுநகர் மாவட்டத்தில் உள்ள அரசு மற்றும் அரசு உதவிபெறும் பள்ளிகளில் பயிலும் மாணவ, மாணவிகளுக்கு வழங்கப்படும் முட்டைகளின் எடை குறைவாக இருப்பது குறித்து புகார்கள் எழுந்துள்ளன. இதனையடுத்து, இந்த பிரச்சனைக்கு தீர்வு காணும் வகையில், முட்டை விநியோகம் செய்யும் நிறுவனத்தின் ஒப்பந்தத்தை ரத்து செய்ய தமிழக அரசுக்கு விருதுநகர் மாவட்ட நிர்வாகம் பரிந்துரை செய்துள்ளது.அரசு நிர்ணயித்த விதிமுறைகளின்படி, மாணவர்களுக்கு வழங்கப்படும் முட்டைகள் குறைந்தபட்சம் 45 கிராம் எடை கொண்டிருக்க வேண்டும்.

 ஆனால், விருதுநகர் மாவட்டத்தின் பல்வேறு பகுதிகளில் உள்ள பள்ளிகளில் மாணவர்களுக்கு வழங்கப்படும் முட்டைகள் நிர்ணயிக்கப்பட்ட எடையை விட குறைவாகவும், சிறியதாகவும் உள்ளதாக புகார்கள் வந்துள்ளன. இது குறித்து மாவட்ட நிர்வாகம் நடத்திய ஆய்வில் இந்த குறைபாடு உறுதி செய்யப்பட்டது.இந்த நிலையில், மாணவர்களின் ஊட்டச்சத்து குறித்து கவலை கொண்டுள்ள மாவட்ட நிர்வாகம், முட்டை விநியோகம் செய்யும் தனியார் நிறுவனத்தின் ஒப்பந்தத்தை ரத்து செய்ய தமிழக அரசுக்கு பரிந்துரை செய்துள்ளது. மேலும், மாற்று நிறுவனம் மூலம் தரமான முட்டைகள் விநியோகம் செய்ய நடவடிக்கை எடுக்க வேண்டும் எனவும் வேண்டுகோள் விடுத்துள்ளது.